מכתב: T-S 12.415
מכתב T-S 12.415What's in the PGP
- תמונה
- 1 Transcription
תיאור
Letter sent from Alexandria by a father to his son, who had run away to the army, trying to bring him back. (Information from Goitein's index cards)
תגים
תמונה
תיעתוק
תרגום
Editor: Goitein, S. D.
T-S 12.415 1r
S. D. Goitein, unpublished editions.
- אלדי אעלם בה ולדי ולעזיז עלי [ו]ענדי קרב
- אללה אלאגתמאע בה קר/י/ב אן שא אללה
- וגיר דאלך מא עמל אחד קבלך ולא בעדך
- מא עמלתה אנא מעך קבל ספרך ביומין וקת
- אן כרגת אנא ואנת לטריק וחלפת לך אן
- מא נכאלפך פי מא תרידה ונעמלך אלדי תשתהי
- איש בקא בעד דאלך מן אלטנך בעד אן סמעתני
- קד חלפת אלימין אנך מא תסאפר אללה תעאלה
- יסאמחך ולא יואיכדך במא עמלתה כליתו
- אתכל[ם] ואסתפתית פי אלימין וכאן עלי נכצר
- כול מא ענדי ולא נחנת אלימין וקד וצל אלאמר
- להדה אלשדד אלעצמא אללה תעאלה יחסן
- אלכלאץ ואלאן לא תקעת סאעה ולא דקיקא
- לאן ואללה לו אנני נקדר נערפך א[יש . . .] נא
- מן אלעמל אלגיד פי גיבתך לקד כונת תכרג
- מן עקלך ולאכן אן גיד סורעה מא יפות שי
- פלו ערפת איש וראך מן אלאעדא מא
- כונת תסאפר ראסא וקצית כלו אלדכאן איש
- וצל בך אלגהל אלא אן תרית כלו דכאנך פי
- גיבתך אלדי יכון לה דרהם יטלב עשרה ותשמת
- אעדאך בך אלאמר כולה מעלק בך תעלא
- ינצלח אלגמיע ולא תפרח בלדי חצל מעך איש
- יכון מקדארה פמן וקת אן סמעת אנך חצרצת
- עלי רוחך וגמעת אלשוי אלדי חצלתה האן עלי
- כול שי ונחן פי אמר אעצם מן האדא כולה אדא
- גית מסירך /ת/בצרה ותערף מקדאר אלאב
- אלגיד מן גירה פלא תנעאק סאעה ואחדה לאן
- אלאמר מא יחתמל עאקה פאללה אללה לא תנעאק
- ללאלא יפות אלאמר כולה וואלדדך תלפת
- מא נקדר נצף לך מא הי פיה פגעל אללה ראי
- אלגהל אהלך נפסך ואהלכת גירך כיף לו
- כונת פי אלעסכר וקת אלהגא [כיף כאן
T-S 12.415 1v
Verso.
- יכון חאלך ואנא נעלם אנך ארתגפת
- פי מצר כתיר פלא תכלף נפסך אכתר מן
- האדא יטאלבך אללה בדנובה לאנך ואללה מא
- כרגת אלא מן אלראי אלמוקארב פאללה תעאלה
- לא ידימה עליך ויכשף ען דהנך גטא אלגהל
- ולא תחמל עלא קלבך לא מן רבח ולא מן כצארה
- מסירך(?) אדא רגעת לעקלך תבצר איש
- נעמל מעך אשתרי בלדי מעך ארץ לך טיבה
- כלי אלשיך אבו אלפרג אבן אלריס ישתריהא לך
- ותוציה יכון ואקף עלי תגרבילהא לאנ/ה/ום
- כול מן ישתריהא יכלט פיהא נתר אללך
- פאחרץ פי שראהא ולבלד ענדנא האדיה מא
- גרא פיהא קצית מוקארבא ולקמח ואקף אלעסל
- אלטיב יסוא במיה וכמסין ולשעיר במיה ולפול
- אלעאל [[ב . .]] בסתין אלמיה ולא תגרר בנפסך לא תגי אלאן
- פי קאפלא או פי מרכב יכון פיה אלנאס כתיר
- לא תגרר פי . . טוא וקד . ג . . אל . . . . כם יכתבו
- לך כותב פלו[לא] האדה אלשדה אלעצימה מא קתרת
- נפתי אלימן פלא תבדלני אכר מן האדא אנת
- תע[לם] מקדר אלאתם אלדי ילזמך ו . . . . ולא
- תתהאון בלגורבא לו מרצת יום כונת תבצר
- אלעגב ומא כאן תסוא אלדניא ענדך שי פארחם
- רוחך ולא תגהל אכתר ממא גהלת ולא יחולך אלדי
- גרא אלאמר פיה רחמא אלדי כאן פי אלשתא אללה
- יורד אלעאקבא לכיר ומא תריד וציה אכתר
- מן האדא וקד סמעת אן מעך כתאב מן
- ענד אלקאצי פלעל יכון ינפענא פי
- האדא אלשוג{ל} אלדי נחן פיה ואיך תגהל
- לספר אן אכר גיר מוגיך סורעה סורעה
