רשומה קשורה ל-מכתב: Halper 411
מכתב Halper 411- ציטוט
- משה גיל, (634–1099) ארץ-ישראל בתקופה המוסלמית הראשונה (in Hebrew) (Tel Aviv University, 1983), vol. 3.
- Location in source
- #462
- Relation to document
- Digital Edition
- מהדורה
- ציטוט
- S. D. Goitein's מהדורה (1950–85).
- Location in source
- Relation to document
- מהדורה
תמונה
תיעתוק
תרגום
Editor: גיל, משה
Halper 411 p. 1
°
משה גיל, (634–1099) ארץ-ישראל בתקופה המוסלמית הראשונה (in Hebrew) (Tel Aviv University, 1983), vol. 3.
Halper 411 p. 2
°
°
- אטאל אללה יאסידי בקאך ואדאם סלאמתך וסעאדתך וכאן לך ולי פיך
- ולייא וחאפצא במנה ופצלה כתאבי אליך מן אלוטן אלמקדס ואלמוצע
- אלמפצל יומ אלה יא בקין מן אייר ען חאל סלאמה ונעמה למולאי אלחמד
- וען שוק שדיד אליך קרב אללה אלגמע עלי אפצל חאל במנה וגודה תקדמת
- לי אליך כתב עדה ומא ראית להא גואב וקד כאן וצל אלי כתאבן בתאריך
- אול ניסן תדכר אנך עלי אלאנחדאר ללאסכנדריה ובקי קלבי מתעלק אלי
- וצול כתאבך בוצול אלטבארה אלדי כתבת ללמגרב אליך פוצל אלי
- כתאב סידי נתן בן ששון אלמגרבי ידכר אנה אפדאהא מן אלכתבי
- וארסלהא אלחנן צהרה מע כתבה ללאסכנדריה וארגו אנהא וצלת אליך
- אלי אלאסכנדריה ואנפדתהא וכתבת לסידי אבו אסחק ברהון בן יצחק
- במא אסלתך פי כתאבי אליך וכנת דכרת לי קדום מולאי אלשיך
- מר רב משה אלינא בעד פסח ואלי אלאן לם נסמע לה כבר וקלובנא
- מתשופה נחוה אללה יכתב סלאמתה ויגמענא עלי אפצל חאל ודכרת
- וצול כתאבי בדפע אלדנאניר לבן זרגאז ואנה מא וצל וקד כאן עלי אלסיר למצר
- מן אול אדר שני פסאלני סידי אבו יעקב ואלדה פי חאגה אלי מצר פסאלתה
- יקבץ מנך //ולדה// הדה אלדנאניר ויכתב אלי ואלדה ידפעהא הנא פכאן מן
אלתעדיר
- אן כתנה חבסה באלרמלה חתי יעיד אלפסח ואלי אלאן הו באלמוצע
- תם וצלת אלספתגה פסאלה ר אברהם יקבצהא באלרמלה וידפעהא הנא
- פלמא תאכר ולדה ען אלנזול אסתופי מא קד כאן אקרצהם פי ופאה
- יהודה נע ואלנחאס וצל בן נחמן מן אול ניסן ורגבת אלי אבו יעקב
- יוסף יכתב אלי ולדה יקבצה ואלי אלאן מא יצל מנה כתאב בקבצה
- פאסל אללה תעאלי יתפצל ברחמתה ויסאהל באלמגותה ואלפרג ואמא
- חאלי יאסידי פי מעישה אלמוצע וציקהא מא יכאד אן יכפא
- ענך אד הוא משהור וישכו בה מן יקדר לנפסה בקוה אלגסם
- ואלמאל פכיף מן עדם אלחאלין גיר אנה רב אלבית תעאלי קד
- מכן מן אלנפס אלאלתדאד ואלסרור ברויה אלמוצע אלמקדס
- ומן אלגסם ברויה אליסיר כתיר ואלתגלד עלי אלמצץ ואלמשקה
- ללכון בין ידיה פי אלמוצע אלדי אכתארה והו תעאלי אלקאדר אל
- מתפצל באלפרג ואלמגותה קריב אן שאללה ומא נחתאג נוסע לך
- אלשרח ואנא נרגו אן כתאבך יצל אלי מן מצר קבל וצול כתאבי הדא
- אליך באגובה כתבי אלמתקדמה אליך ובחאלך וסלאמתך פאן קלבי
- וגנארחי אליך וענדך אסל אללה תעאלי יבלגנא פיך אפצל אלאמאל ויסמענא
- ענך מא נסר בה ויתקבל מנא צאלח אלדעא לך פי הדא אל[מו]צע אלשריף
- תכתץ נפסך אלשריפה אפצל אלסלאם וסידתי אלאכת תכצך אפצל אלסלאם
Right Margin
- ואבו יוסף יכצך אפצל אלסלאם וארגו אנך אנפדת אלי גואב נסים
- ור אברהם החבר ור שמעיה החבר יבלגוך אפצל אלסלאם
°
Verso
- אכי וסידי אבו יהיי אטאל אללה בקאה מן משה ביר יעקב נע
يصل الفسطاط ان شاء الله
- ואדאם תאיידה ונעמאה
- נהראי בן נסים נע אללה וליה
Upside-Down, Right
- يصل الى نهراي بن نسيم
- المغربي من موسى بن يعقوب
Left
- الحسين بن عبد الرحمن نجا بن الحسين اﻻنصاري