Letter: T-S 13J16.4

Letter T-S 13J16.4

Tags

Input date

In PGP since 1986

Description

Letter from Yisrael b. Natan, Jerusalem, to Nahray b. Nissim, Fustat ,

Images and transcription

Transcription

Recto

  • כתאבי יאכי וסידי אלעזיז עלי אטאל אללה בקאך ואדאם נעמאך
  • וצרף אלאסוא ענך ברחמתה מן אלקדס עמרה אללה יום ערובה סוכות
  • מן בעד וצולי מן בלד אלרום אלהי ישראל ישימהו שממה וקד תפצל
  • אללה עלי וכלצני בעד צרות עטימה לו חתי גית אשרח לך דלך למא
  • כפתני חמלין ורק אקול ואשכר אלהי ישראל אודך על כל נוראות
  • נפלאת נפלאים מעשיך ונפשי יודעת מאד וקאל מציל עני מחזק
  • ממנו וקד אכרגני אללה מן אלחבוס מן אלקצטנטיניה וכנת אקול
  • ואנא פי בלד אלרום אן כלצני אללה אקים באלקדס ואלאן יאכי אנא
  • עלי אלאקאמה פי הדה אלסנה האהנא ולקד וצלת בעד תעב
  • כתיר ולו לם אקים פי מוצע בעד כרוגי מן אלקצטנטיניה נחו
  • אלכ שהו[ר] כנת אכתב אלספרים ואצייק עלי נפסי פי אלנפקה
  • אלי אן פצל מעי שי תחאמלת בה עלי אלטריק ובעת בעץ
  • תיאבי פי מדינה צור אלי אן וצלת ללקדס ואלאן קד כתבת
  • לסידי אבוסחק ברהון כתאב וסאלתה יקרצני ח דנאניר ינפדהא
  • אלי ויציפהא למא בי[ני] ובי[נ]ה מן אלחסאב פאחב תאכד עליה פי
  • דלך וכדלך אסאלך אנת א[ן תקרצני ה] דנאניר או ד דנאניר
  • ותשתרי לי מן דלך כסא אוסע [ ] או קרוי יכון תקיל לאן אל
  • קדס בארד עצים ותשתרי לי פרו טולה ה אשבאר אלבסה בין
  • אלתיאב ועמאמה גירי או נצף איש מא סהל עליך ותתבת
  • דלך עלי תציפה למא ביני ובינך לאן לך ענדי אלחסאב אלדי תערף
  • וקד כאן וצל אלי כתאבך מע ידעיה אלנרבוני וכתאב אכר מן
  • קבלה מע כתאב מן סידי אבו סעיד אדאם אללה עזה ולא גיר
  • ואלאן יאסידי לא תגפל ען הדא אלדי כתבת אליך ואני קד הלכת
  • באלברד וליס לי לא גבה ולא שי לאן כאנת עלי תיאב רומיה
  • בעתהא בצור ואבא פי ציקה עטימה אקול כק ירמיה
  • אני הגבר ראה עני בשבט עברתו וקאל איוב מעי רתחו
  • ולא דמו קדמוני ימי עני וקאל יי נתן ויי לקח יהי שם יי
  • מבורך ולא תטן אן הדא אלדי גרי עלי כלה והדה אלצרות עבת
  • בל אללה יתיבני אללה ויגעלהא תמחיץ למא סלף מן אלדנוב
  • מוסר יי בנ[י] אל תמאס [ו]אל [תקוץ] בתוכחתו כי את יאהב
  • יוכיח וכאב את בן ירצה

Right Margin

  • וענד וצול סלמא[ן]
  • בן שמעון יערפך
  • אלאסבאב וגמיע
  • מא אנא פי[ה]
  • ולא תתואנא פי
  • גמיע מא כתבתה
  • אליך אן שא אללה
  • וכדלך ת > כ < תב
  • מולאי אבוסחק
  • ברהון פי אל סחק ברהון
  • תוגיה אלדנאניר
  • לאן ליס בידי שי
  • ואללה ידרכני
  • מכאפאתכם
  • גמיעא אן שא אללה
  • קראת עלי כאצה
  • נפסך אלשריפה
  • אפצל אלסלם
  • וסידי אבו
  • סחק ברהון

Top Margin

  • בן צאלח אלסלם
  • וסידי אבו
  • אברהים
  • עיאש אל
  • סלם וגמיע
  • אצחאבנא
  • אלסלם
  • וכתבת
  • ען סרעה
  • פאעתדר
  • פי קלה
  • אלשרח

Verso Right

  • לאכי וסידי אבי יחיי נהראי בן נסים ננ בן נהראי ננ
  • אטאל אללה בקאה ואדאם תאיידה ונעמאה

#

  • نجا بن الحسين اﻻنصاري
  • ﻻخي وسيدي ابي يحيي نهراي بن نسيم بن نهراي المغربي
  • اطال الل٥ بقا٥ وادام عز٥ وتاييد٥ وسعادته ونعما٥

# Left

  • מן ישראל בן נתן ננ בן נהראי ננ
  • בן עמה

#

  • محمد بن نجا
  • من اسراييل بن سهلان المغربي الفسطاط
  • ان شاء الله
Image Permissions Statement
  • T-S 13J16.4: Provided by Cambridge University Library. Zooming image © Cambridge University Library, All rights reserved. This image may be used in accord with fair use and fair dealing provisions, including teaching and research. If you wish to reproduce it within publications or on the public web, please contact genizah@lib.cam.ac.uk.