Letter: T-S 13J23.15

Letter T-S 13J23.15

Input date

In PGP since 2017

Description

Letter sent from al-Mahdiyya by Hayyim b. Immanuel to Mevorakh b. Saadya in Fustat, dealing with a purchase of books for Mevorakh from the estate of Berekhya and dismissing the allegation that the recipient was stealing partners from existing partnerships. Dated ca. 1063. (Information from Gil)

Images and transcription

Transcription

  • כתאבי אטאל אללה בקא מולאי אלחבר אלגליל ואדאם עזה ותאיידה וסעאדתה וסלאמתה
  • ונעמאה מן אלמהדיה לג איאם כלון מן תשרי תקבל אללה מנה הדה אלאיאם אלמבארכה
  • ויזכה שנים רבות שוש שמח שלם ויכתב בספר חיים ובספר מחילה וסליחה
  • ען סלאמה תתם בבקאה ואלחמד ללה רב אלעאלמין וקד עלם אללה שדה שוקי לחצרתה
  • אללה תעאלי ימן באלאגתמאע עלי אסר אלאמור וקד תקדם כתאבי לחצרה מולאי אלחבר
  • אדאם אללה עזה משרוח מע אלאשפילי ארגו וקופה עליה ערפתה חאלי ואן אלעדליאת
  • תרכתהא באלאסכנדריה ומן מעולי פיהא עלי תפצל אללה ותפצל מולאי אלחבר אלגליל
  • פי אן יסעפני בגאהה פי חמלהא אול אלזמאן אן שא אללה ואנא //אעלם// אן מא יזיד חצורי שי
  • אללה תעאלי ימנני בטול בקאה וקד כנת ערפת[[ה]] פי כתאבי חאל אלמצאחף ואן מולאי
  • אלשיך אבו אסחק תוקף וכשי אן יוגה שי מכרר ואראד לו כאנת מעי פרהסה(!) בגמיע
  • מא ענד מולאי אלחבר מן אלתשובות ליעזם פי מא יעוזה מן אלתשובות ואלפירושים
  • פנחב מן מולאי יסארע בדאלך מע אול פיג(!) יצל אלי ענדנא וקד דכלנא אלי מצאחף רב
  • ברכיה זל והי כתירא(!) במרה ואלדי אכתצר מולאי אלשיך אבו אסחק עלי ז ק[ט]ע
  • ד תשובות וקטעתין אלמוגוד מן פירוש שבת וקטעה י כראריס פירוש פרקים
  • מפתרקה וקד דכלנא עליהא מולאי אבי אלחסן בן סגמאר וקומה בעשרה דנא וחמלה
  • פי רזמה לשיך(!) אבו סעיד דאוד בן שעיא טלעת פי מרכב פכר אלערב אללה יכתב סלאמתה
  • וקד כנת עלי וזן אלתמן ישהד אללה מן ענדי אלי אן קאל לי מולאי אלשיך אבי אלחסן בן סגמאר
  • אנה נזן אלתמן ממא בידי לאכי אלשיך אבו זכרי בחיר הישיבה ולם נלחק נכתב אלפהרסה
  • וקד גאו ישהד אללה אלסנה סגלמאסין יטלבו מן מצאחפהא אעני הדה אלאמראה פלם נסאעדהא
  • חתי נעלם חקיקה מא יותרה מנהא מולאי אלחבר אדאם אללה עזה פנחב סרעה פהרסה מא ענדה
  • מעול עלי אמסאך מא יחתאג אליה מן מצאחף רב ברכיה ואמא מצאחף רב נסים זל פקד אנצרפת
  • בגמלתהא ולם יבק פיהא שי יצלח לה גמלה וקד קאבל לה מולאי אלשיך אבו אסחק אלדי כתב מן אלפירוש
  • והו יגד פי הדה אלשתוה פי מעונה מולאי אבו סהל מנשה פי אנתסאך בקיתה ומקאבלתה ויהתם הו
  • איצא בנסכאת אכר ממא תצלח למולאי אלחבר פמא אחסן נצף למולאי רגבתה ואגתהאדה פי
  • חואיגה ועצם מודתה ואבתהאגה אללה תעאלי יעין עלי מא יואפק מראדה וקד כתבת ל[מו]לאי
  • אלנגיד אלגליל חכם עלינא ועלי כל ינצר עזה וערפתה מא גרי פי חאל אלעצמות ואני לח ואללה
  • אלעצים נבקי ולם יכן אלחאל מעלקבי וחדי אלא בגמאעה ומולאי יעלם חואיג אלגמאעה אנהא
  • מא תתפק וקד עלמו כתיר מן אלנאס אגתהאדי אול דאלך רב מצליח וגירה דאלך פלא יכון ינסב אלי
  • אהמאל ולא גפלה פאללה תעאלי יעלם וכתיר מן אלנאס הונא עלמו צחה קולי מן סקמה וממא
  • אעלם בה מולאי אלחבר אדאם אללה עזה אן חאל עלי פי הדא אלבלד אמר לא אקדר אצפה
  • ודלך אני אנסב אליי אני מצית אלי אלשיך אבי אלפצל סהל בן חסן ואלשיך אבו אלעלא יוסף בן דאוד
  • בן שעיא וטלבת מנהם אן יחמלו מעי רחל ואנא ואללה אלרחמן אלרחים וחק תורת מ[שה
  • הקדושה מא פעלת שי מן הדא מד קט ומא סאלת ולא רגבת ולא באדית אחד בשי מן הדא

Right margin, diagonal lines written upside down.

  • לא הם ולא גירהם | פואללה אן אמכן מולאי | אלחבר אן יסאלהם ען | צדק מקאלי הדא או | סקמה פליתפצל | ויסאלהם ואמא אל | שיך אבו סעיד פמא | לי מעה יד פי שי | ולו ואללה אלעצים טלעת | מ]ן אסכנדריה למצר חתי | עלמת אנה יחמל רחלה | לשריכה אלשיך אבו אסחק | ותחקקת דאלך תם קאלה | לי אלרגל וקת אגתמאעי |
  • בה פכאן יחסן מני | נקול לה לא תוגה אלי | אלרגל שי לאגל אני | שריכה מא אמרני | ישהד אללה נקול לה | שי תם אן פי מא | יתעלק פי מע | גירה יגוז | אן יקול

Top margin, diagonal lines written upside down.

  • לי אנסאן אחמל | לי צחבתך בעד | אן נכון מסתגני | תחת כפאיה נקול | ולה //מא נפעל// י.כנ .י | ישהד אללה הדא | פאנסב אלי אני | משית וטלבת | ואסתענת עליהם | פחרם אללה פאעל | הדא ומן קאל עני | מא ליס //הו// ומולאי | עלם מן מא לי | במצר במן | נסתעין

Verso.

  • אלא במולאי אלנגיד ובה פהל ראו מני שי מן הדא פמא אנסב אלי אללה תעאלי לא יחד מני תואבה ול[א
  • יחאלל(!) מן אנסב אלי מא ליס קבלי ואנא נעלם אן הדא כלה אנמא פעל ליפסד עלי בה חאל ליהדם ש[
  • ממא חצל ואנא ישהד אללה מא נרד אמרי פי סאיר אלאמור אלא אלי אללה פמן יוריני אלהי ישר יכן ביני
  • ובינה עד ודיין לאנהם ירידו יפרקו ביני ובין עגוזה כבירה עמרהא עה סנה ואטפאל צגאר יגליוני מן בינהם
  • ויטלבו יקטעו מעאשי ישגר אללה מא נקימהם אלא פי הדה //אלליאלי אלעצימה// אלעגוז ואלאטפאל ידעו אלי אללה פי מן יסעא פי
  • אדאי ויטלב יגליני מן בינהם אן כנת אדית אחד פהדאך אלקום במצר יקולו גא אלינא ואפסד או תכלם או קאל
  • אעטיני עלם כל אנסאן ענד אללה אנה ישהד אללה מא אתכלת //אלא// עלי אלבארי יתברך שמו ונסמע אלקביח
  • ונחמל תם אתגו אלי אנסאן לא יכאלטהם מנז י פי ביתה יקרא אלתורה תעלקו בה לאגל אן ביני ובינה שרכה
  • עסי יציקוה ירפע ידה בעל הגמול ישלם גמולם מא לנא טאקה אלא באללה יתברך ומא געלני כתבת
  • למולאי הדה אלאסטר אלא אן בלגני אן תם מן יכתב וינסב אלי שי פאן כאן קבלי שי פמן תם יעלם צחתה
  • מן סקמה ועלי כל חאל אללה אלמסתעין ואני מנתצר כתאב מולאי אלחבר מע אלפיג(!) באלפהרסה ובגמיע מא יחתאג אליה
  • מן אלכתב נעול עלי אמסאכה כצצת מולאי אלחבר באתם אלסלם וגמיע מן תשמלה ענאיתה את . .

Bottom margin, parallel lines written upside down. Address.

  • חצרה מולאי אלחבר אלגליל כבוד גדו קדוש ולייה חיים בן עמנואל
  • מר ורבנ מבורך החבר בס גדו
  • . .יה בר סעדיה זל
Image Permissions Statement
  • T-S 13J23.15: Provided by Cambridge University Library. Zooming image © Cambridge University Library, All rights reserved. This image may be used in accord with fair use and fair dealing provisions, including teaching and research. If you wish to reproduce it within publications or on the public web, please contact genizah@lib.cam.ac.uk.