מכתב: Moss. IV,7
מכתב Moss. IV,7תגים
תיאור
Letter on the forced conversion of Yemenite Jews, but business as usual. Aden, August 1199.
Edition: Goitein, S. D.; Friedman, Mordechai Akiva
Translation:
Moss. IV,7 1r
תיעתוק
S. D. Goitein and Mordechai Akiva Friedman, India traders of the middle ages : documents from the Cairo Geniza : India book (Leiden and Boston: Brill, 2008), vol. 2.II, 66
- דינ[...]
- דיננא
- עדן וסאעה וצולה אגצ[ב ...]
- וקאל לה תסלם או תקתל אכת[ר אליהוד]
- ובכא בכא שדיד ולם יגד וגה ללת[כלץ]
- סוי אנה אסלם וכאן קבל וצולה אלי ע[ד]ן
- קד בשע גמיע מן מעה פי אלגבאל אלסדיד
- אלטביב וכל מן פי אלגבא[ל] ולם יבק סוי
- יהוד עדן וכאן אסלאם אלשיך מצמון
- יום אלארבעא מסתהל דו אלקעדה פלמא כאן
- יום אלגמעה תאלת יום צרב אלגרס מעאשר אליהוד
- כאפה מן יתאכר ען טלוע אלמנצר מן בכרה אלי
- אלטהר קתל פלם יבקא אחד מן אליהוד דון אן טלע
- אלי אלמנטר פ[א]מר באן כל מן תברא ען אלסלאם
- יקתל [[פאב]] פאבשעו אלגמיע ותאבו דינין
- ען אלאסלאם צרבת ארקאבהם ואמא נחן פלא
- תסאל מא גרי עלי קלובנא מן אלאלם פכאן יום
- מא שאהדנא קט אשד מנה ועמל אללה תעאלי
- מענא אות וכלצנא לא בחיל ולא בקוה ו[לא...]
- בל בפצלה ואחסאנה פאן ענד מא טלענא
- מעהם אלמנטר אגתמעו אלגרבא וחדהם
- ושאורו עליהם אלכליפה פאנטק אללה עלי לסאנה
- באן קאל גריב לא יעארץ ואמר באן יזן כל
- שכץ תלת גואל פוזנא דלך ותכלצ[נא]
- נחן עלי אחסן קציה ללה אלשכר הדא גמלה
- מא גרי ואן כנת ואללה אלעטים מא אקדר אעבר
- ען בעץ מא גרי פאן ליס אלעיא כאלכבר
- וקאסו אלתגאר מן אלאהאנה פי מא צח ען
- אלגראמה ולטף אללה תעאלי לאנה [כ]אן אמר
- באן יוכד מן כל מן יצל כמסה עשרה דינאר
- אלמאיה ומן אלכרג מתל דלך פלטף אללה
- באנה רגע אמר באן יבקא הדא אלכארם
תרגום
Moss. IV,7 1v
Verso:
- עלי חאלה לא יזאד עליה שי ואי מן וצל
- בעד דלך יוכד מנה כמסה עשרה דינאר
- אלמאיה מן כל שי ומן אלדהב ואלפצה ואלקמח
- ואלדקיק וכל שי והדא רזק מן יצל אלסנה אלאתיה
- ואמא אלאסעאר פאן אלפלפל אנבאע אלבהאר
- מב ורגע בלג מה ואלקרפה אלבהאר מה
- אלבקם מכתלף אלאמרי אלטיב אלבהאר יח
- ואלוסט יו ואלטראף אלבהאר יו ואלטויל
- אלבהאר יח אלניל אלהנדי אלקטעה ע דינאר
- אלקרנפל מא מנה שי אלמקארב סה ואלג[יד]
- סה אלעשרה אלמאמיראן מא מנה שי
- אלאכאפור (!) אלגדיד ח אלמן אלאעואד מתוסטה
- גאליה וכאן סער אלנחאס אלפגרה אול
- עב ובלג פה ואלקציב ע בלג צ
- ואלקזדיר ע [[ב]] ואלמרגאן באיע
- ואלכחל אלשלודי אלבהאר יז ואלמגרבי
- אלבהאר כה אלטיב אלשיבה אלבהאר כ
- ואלזנגפר אלעשרה יח אלזיבק אלעשרה יז
- ערפת מולאי דלך וקד אסתכרת אללה
- וכרגת פי מרכב אבן סלמון אלדי
- דכלת פיה ואללה יתולא אלסלאמה ברחמתה
- ואכי אבו נצר יכרג צחבה א[..] ערפת
- מולאי דלך בעד תקביל ידיהא
- ורגליה
- [תמ]ן אלכחל ואלשיבה וגמיע דלך יצלך
- [פי]ה כתאב לשיך חסן וקד שרי לך מן
- אלספינה דלך סיד ניל הנדי תמה של
- דינאר ערפת מולאי דלך ושלום
