מכתב: T-S 16.345

Recto

1. בשמ רחמ
2. וצל כתאב חצרה אלשיך אלאגל מולאי אטאל אללה
3. בקאה ואדאם עזה ונעמאה וחראסתה וזלפאה
4. וגבטתה וארתקאה ורפעתה וסנאה ועונה ועליאה
5. ומן חסן תופיקה לא אכלאה וכבת חאסדה ואהלך
6. שאניה וצדה במנה וגודה אן שא אללה ואלדי יריד
7. עלמה אדאם אללה עזה אני וצלת מן אלהנד עלי
8. גמלה אלסלאמה יודו ליוי חסדו וג ולם נעדם גיר
9. אלנצר אלי טלעתכם אלרשידה סהל אללה סרעה אללקא
10. עלי אסר אלאחואל אלסארה ואבלג אלאמאל אלקארה
11. אן שא אללה וקד סהל אללה תע ועול עבדה עלי
12. אלרגוע אלי אלהנד אללה תע יגעל אלעאקבה אלי כיר
13. ודכר מולאי אדאם אללה עזה וצול אלעבד אליה וקד
14. פרח עבדה בוצולה אליה עלי גמלה אלסלאמה
15. ודכר איצא וצול אלחואיג אלדי כאנת צחבה אלשיך
16. נהראי בן עלאן וקד סרני דאלך וטלב מולאי עמאמה
17. לאנס וקד אנפדת לה עמאמה לאנס רפיעה
18. מטרזה ואנפדת איצא לואלדה אכרי וכתבת עלי
19. כל טרף ואחדה (!) אסם צאחבהא תקבצו דאלך מן
20. אלשיך אבו אלרצא בן צבי שמעה כתב אללה סלאמתה
21. וקד אנפדת לך איצא צחבתה וטא מליח קצי לרגלך
22. וכנת הדה אלסנה מאמל עלי אלכרוג אלי דיאר מצר
23. פלם יתפק לי כרוג לחאל אלעבוס אלתי טרת אללה יגעל
24. אלעאקבה אלי כיר ותכץ עני ואלדתך באפצל אלסלאם
25. ותערפהא שוקי אליהא ואנא אן שא אללה אחרץ עלי
26. אלכרוג אליכם אלסנה אלקאבלה לכל בד אן שאללה
27. חצרתה מכצוצה באפצל אלסלאם אלגזיל ותכץ עני
28. אלאהל גמיעהם באפצל אלסלאם וגמיע אצחאבנא
29. ומן סאל ענא מכצוצין באפצל אלסלאם אלגזיל וכאן
30. אלשיך אבו נצר קד אנפד מעי לחצרתך מזוד פיה
31. כיט צפר אחמר וקד אבעתה בז מתאקיל ולאלשיך
32. אבו נצר קימה מר מתקאלין צח תסעה מתאקיל
33. שרית לכם פיה סתין מן טבאשיר וקד סלמת לאלשיך
34. אלאגל מצמון ינפדה פי אלכארם מע בעץ מן ירא
35. לאני מסאפר וכתבת הדה אלכתאב ואנא דאלך אליום

Margins:

מקלע יעלם מולאי דאלך מע מא יבדו לחצרתה מן חאגה או כדמה שרף עבדה בהא חצרתה מכצוצה באפצל אלסלאם אלגזיל ושלום רב ישע קרוב

Address on verso:

חצרה אלשיך אלאגל מולאי סלימאן ממלוכה

כהן (!) בן יהודה חרס אללה איאמה מחרוז בן יעקב רית