מכתב: ENA 2575.7 + ENA 2575.8

[...]ב אמארה כל

[...]לה וגרם אלף וכמס מאיה

דרהם ומן גהה אלעבד מבארך פשעיה פי אסכנדריא

ואכדה אלמחתסב בלאש מא סלם פיה שי וגרם אכוך

כמס מאיה לכון א . . ם קאלו לה הדא גוי פמא קעד אכוך

פי מצר בעד מא גא מן אסכנדריא אלא נצף שהר תופא

סלימאן רֿיֿהֿ פחזנא עליה חזן עטים מנהא וסאפרנא

לטור ומא עמרה אשתרי חואיג וקמאש ועקאראת

ושראבאת ונחאס מסתעמל וצנאדיק ובצת ולא בקא

[ש]י חתי אשתרי מנה ודהב כתיר כאן מעה שי לה ושי ודאעה

[] . יחמל מן מצר כמסה ועשרין גמל פלמא וצלנא

אלטור וצלת ורקה מן ענד אלאך(?) רשיד אל . . . באן

[א]כוך מא יסאפר אלא פי מרכבה פאספ . . . . א . נא

אלפוי וטיר אלפלאח פסאפרנא בעדהם בעשרין יום

משינא תלאתה איאם יום אלראבע חצל עלינא ריח

עאסף רדינא אלי מוצע מא כנא פקעדנא ארבעה

איאם נרוח ונרגע פאדא יום אלראבע ונחנא ראיחין

נגרק פאדא בדכאן טלע מן אלמרכב פי סאעה טלעת

אלנאר אחתרקת אלקלוע וכל מא פי אלמרכב רגאל

אלמרכב יערפו יעומו רמו נפוסהם אלי אלבחר מא בקא

אלא מן לא יערף יעום ומן גהת אכוך באנה נזל אל[י]

אלבליג ומא אעלם מא אכר פי חזתה ותחזם בתובין

תלאתה פלמן קרבת אלינא אלנאר רמית רוחי אלבחר קלת

בדאל מא ארוח חריק ארוח גריק רמית רוחי אלבחר ולם

אערף מא גרי לאכוך לקית חבל פי אלמרכב תעלקת

בה קעת מעלק אלי אן אכתלעו אכתאפי וכאנת אלנאר

תקע פוקי מן פוק אלמרכב ואנא גאטס פי אלבחר

ובלמוגי כמתל אלגבל פוקי ודאך אלמוצע אלדי וקענא

פיה מא לה קראר קאלו אלרבאבין אכתר מן אלפין קאמה

פי מוצע יקאל לה תאראן פלמן חסית אכתאפי אכתלעו

תאניה וטלעת ולם יכון ענדי שי אתעלק בה ולא אמסכה

פי טלועי צכר אללה לי כשבה ולם יכון ענדי שי אלא מא

אערף מניין אתני בעת לי איאהא הקבה פי סאעה גרק

אלמרכב לם אדרי אלא בגמאעה נסא ורגאל קדר ארבעין

רוח והם עלי אכשאב ורבטו אלכשב כלהם בעצהם בעץ

ובקינא כלנא פי מוצע ואחד קעדנא כדא עלי אלכשב

יומין ולילא לם אדרי יום אלתאני אלא ואכוך מענא עלי

אלכשב והו עריאן כאדם (=كآدم؟) והו ביטאלע פי אלרוח ואנא אלאכר

כנת עריאן מתלה מא נדרי יום אלתאלת אלא וגאנא צנבוק

אלמרכב אכדנא וטלע בנא אלי אלבר וקד נחנא מותא

מן אלגוע ואלעטש ואלברב (=אלברד) ומן גהה אלגוים אלדי טלעו

מענא אלי אלבר מא אחד וקף אלא ראח יפתש עלי אלמא לם

בקי פי אלבר אלא אנא ואכוך וואחד גוי פשפקו אהל אלצנבוק

עלי אכוך וכאן פי מ/ו/צע אכר מרכב ראיח אלי אלטו{ר} קאלו

נטלע במוסי אלי אלמרכב ונסקיה שרבה מא ונגטיה

בכרקה לאלא ימות ולא ילקא מן ידפנה ואמא אנא מא

כנת אערף אלליל מן אלנהאר מן אלוגע ואלפגעה פרקת

כיף(?) אללילא אנא ואלגוי פי אלבר ולם מענא שי לא נאכל

ולא נשרב ואנא עריאן כאדם אללה עליא שאהד מא וצלת

ללבר ולא עלי גסמי כרקה ולו אנה בפלס אלא עריאן

כמתל אלצגיר ומא זאד קתלני אלא אלברד פלמא אצבח

אלצבח לקית אלגוי מיית פבקית וחדי לא אין אערף לא 

ארוח ולא אגי פבקית אמשי סאעה ואקעד סאעה מן

אלתעב משיא אלי נצף אלנהאר עלי אתר אלנאס חתי אללה

אוצלני אלי אלגמאעה פטלבת מנהם שרבת אלמא כאן

אלחדית יום אלראבע צאבר מן אלמא ואלטעאם חתי לקית

ענדהם קליל מא מאלח יקטע אלחלק מא אדרי אלא וגו

נאס מן אלמרכב אלדי טלעו בה אכוך ודרכו (=ודכרו?) באן סאעה

טלועה אלמרכב תופא פאגו נאס אכרין ואכרין והם יקולו

עלי הדה אלכלאם פמצית מע אלגמאעה תמאן איאם

חתי וצלנא ללטור פרחמני אללה ברבאן קאת לי ומקדם

אלבלד וכאן מעהם אמל פעקבוני סאעה וסאעה ואכתלם(?)

גסמי כלה מן אלשמס וכאן כלה לחמא ואחדא פלמא

וצלת אלי אלטור ואנא עריאן פאעטאני ואחד נצראני

ואלאחד ויום אלאתנין אלראס(?) פאכתרית מן ואחד ערבי

בתלתין דרהם אלי מצר פיקעד בי יומין אלסבת ואלכפור

אלי אן וצל בי אלקאהרה וקד אנא מיית מן אלתעב וגסמי

מכלץ כולה מן אלשמס וצלת אלי אלכניס קאמו אליהוד

גבו ללערבי תלאתין דרהם כראה ורמו עליא עמאמה

וקמיץ לאני מא וצלת להם אלא עריאן מא עליא אלא כלק

גבת(?) אלנצרה ואנא אקרע חאפי פקעת פי אלקאהרה

עשרין יום פאתנין תלאתה אחסנו אליא ורח{ת} אלי מצר

ודא אלוקת אנא קאעד פי מצר לא אערף אין ארוח

ולא אין אגי ולא מעי שי כנת אתעלק מע אחד מן

אצחאב אלמראכב ואללה עליא שאהד לם טלעת מן

אלבחר ומעי לא מא אקל ולא מא אכתרי ל[[א]]אנה

אנה כרקא תסוא פלס ולא אערף מא יכון אמרי וכיף

יכון כלאצי אריד מן אללה תע ומן הקבה אלדי אנשלני

מן אלבחאר ואלנאר קאדר אן יקאבל מא ביני ובינכם

פי כיר ועאפיה ואללה קאדר עלי כל שי ואלשכץ אלדי

כנת מתכי עליה ראח אלי רחמת אללה תע מא בקי

בלחין אלא הקבה ולא תסאל מא חזנת עליה ועלי

סלימאן וחק דיני לו אחכי לך בכל מא גרי לנא מן

יום מא סאפרנא אלי אן גרי עלינא הדה אלשדה מא כאן

יכפאני בקדר הדה אלכתאב עשר מראר אלי כם הדא

אכתצאר ולא פי מצר אחד אלא והו חזין עליה

יהוד ומסלמין וגרקו גוים כתיר וחריק כתיר מא

אחתרק ועליהם מתלמא(?) אחתרקו על אכוך ולא טלע

מרכב תגאר ושחנא(?) מתל הדה אלמרכב לקל אלקסרייה(?)

ואלעוון ואלדי כאן תחת א . . . שי יסוי  אלפין וכמס מאיה

דרהם לי ולגירי ודאיע אלא אלאמר ללא תע פלא

אחד בידה חילה אללה עטא ואללה אכד ומא כאן

אמתנאעי באני אתעלק מע אחד ואנא עריאן

ואגי אליכם אלא ינכסר קלבכם כיף אני גית אנא

ואכוך ולא אלא ינסא(?) יהון אלצ . . . . . . . . .

מלך מלכי המלכים הקבה בלוצול אליכם ואלסלם

ואלעאפיא ובאחסאנך סלם לי עלי ואלדך ועלי

נפסך באלף אלפי שלום ושלום