Letter: Bodl. MS heb. b 11/10

Letter Bodl. MS heb. b 11/10

Tags

Input date

In PGP since 1987

Description

Letter from Moshe b. Yiṣḥaq the Qaraite, in Jerusalem, to Shemuel b. ʿAzarya b. Mevasser, one of the leaders of the Qaraites in Fustat, Dating: ca. 1044 CE. Reporting on the state of the barley crop (for calendrical purposes) among other matters.

Images and transcription

Transcription

  • כתאבי אטאל אללה בקא מולאי אלשיך אלפאצל ואדאם עזה ותאיידה וסעאדתה
  • וחראסתה וסלאמתה מן אלמסתקר אלקדס אלשריף חרסה אללה ועמרה
  • בבקאיה לתמאן כלון מן שעבאן ערפה אללה ברכתה במנה וכרמה
  • ומא יליה מן אלשהור ואלסנין ען סלאמה פי אלנפס ושגל קלב וצעובה אחואל
  • ואלחמד ללה עלי גמיע אלאמור ושוקי אליה שדיד ואלי נטר טלעתה אלמבארכה
  • [צאנהא] אללה וחרסהא וקרב אלאגתמאע בהא פי הדא אלמוצע אלכאץ עלי אסר
  • חאל במנה וכרמה ואסלה גל אסמה באלמנה באסתגאבה מא אנא מואצלה
  • למולאי אלשיך מן אלאדעייה אלצאלחה לילי ונהארי פי אבואב הדא אלקדס אלשריף
  • קדאם הדא אלבית אלגליל ואן ידים לה אלסלאמה ואלנעמה ויחרס אלנעם לדיה
  • ויכאתרהא אליה ולא אכלא דאימא מנה ומן מנאפעה ולא יעדמה פעל אלחסדים
  • ברחמתה ומא יכפא ענה האל ירבה כבודו ויתמיד שלום הודו סו חאל עבדה
  • ונקץ אמורה וסבבה אנקטאעה מן אלתצרף ותפרדה פי אלבית לטלבה מא
  • ירציה תע ולתופרה עלי אלצלאה פי אבואב הדא אלקדס אלשריף קדאם הדא
  • אלבית אלגליל האל אלהינו יקרב שכלולו בימינו בחיי ועל ידי הזקן החסיד הגדול
  • אדירנו ורבנו פאן ראי מולאי אלשיך צורו ירבה הדרו מסאעדתה ומעונתה
  • וארפאדה בשי ואגראה עלי אלמעהוד מן פצלה במא סהל פאן לה פי דלך
  • קרבא עטימא אלי אללה גל ועז ויגתנם מן עבדה חרסה אללה כתרה אלאדעייה
  • אלמבארכה בעקב כל צלאה ופי כל דעא פי אבואב הדא אלמקדש אלגליל
  • האל אלהינו יקרב שכלולו בימינו בחיי ועל ידי הזקן המכובד אדירנו ורבנו
  • ואן יבקי עלינא מולאי אלשיך ולדה אבו אלפצל רב עזרא החכם והישר והעניו
  • והחסיד והנדיב בכל דבר והמאושר בכל דבר ומולאי ולדה אבו אלחסין
  • רב מבורך בני כבוד גדו אדירנו ורבנו רב שמואל בן עזריה //בן מבשר// האל יתמיד [מש]ך
  • שלומיהם וירבה מאד גדולת הדריהם ויראם זרע תמימים וניניהם אחריהם
  • בחיי האדון המיוקר הישר המאושר הוריהם האלהים יתמיד שלום הודו
  • עלינו ועליהם ומא אראד ליעלמה מולאי אלשיך אדאם אללה עזה מן
  • כבר אלאביב פאנהם וקפו פי מסתהל הדא אלשהר והו שעבאן עלי חקל זרע
  • שעיר בדארה קפיז פכאן גאלבה אכצר מגבן ואליסיר פיה אכצר דגן והדא
  • אבלג חקל וגדוה פי נאחיה אלדארום אלתי הי אבלג אלנואחי פמא עולנא
  • עליה אללה /ס/יכון יעול עליה מן יקנעה מן אלאביב דון אלדון אלדון וקד מרו קום
  • מן בעד דלך אלי רפח ונואחיהא וקום אכר בעתהם מולאי אלרייס אדאם
  • אללה עזה אלי אלגוור אלי זגר ונואחיהא ואלאכואר מתראדפה [להא ולם]
  • יגדו שי אבלג ממא קד וגדוה: ערפת בדלך גליל חצרתה אדאם אללה
  • עזה ואן חצלת זיאדה מן בעד הדא ערפת [[חצרתה]] גליל חצרתה חרסה
  • אללה בדלך ושלום הודו אדירנו ורבנו הזקן המכובד והחסיד והישר
  • יגדל ויעצם מעתה ועד לעד וכצצת מוליי אלשיכיין ולדייה חרסהמא אללה
  • באפצל אלסלאם וכצצת מולאי אלשיך אלפאצל אבו אלחסין רב עלי בן
  • צדקה חמו מולאי אלשיך ולדה באפצל אלסלאם ואטייבה ואדכאה אסל אללה אשמאלה
  • פיה ופי כל מחסן כל דעוה צאלחה פי הדא אלקדס אלמבארך אנה ולי אל
  • אגאבה לא אלה אלא הו
  • משה בן יצחק עבדו המתפלל בכל עת בעדו