Letter: T-S 10J5.12

Letter T-S 10J5.12

Tags

Input date

In PGP since 1987

Description

Letter of business from Isma'il b. Ishaq al-Andalusi, in Tyre, to Nahray b. Nissim. The writer alludes to his great losses at sea while simultaneously thanking God, who has replaced what has been lost many times over. Also includes a quotation from II Shemuel 14:20. (S. D. Goitein, Mediterranean Society, 1:60, 332, 405, 485; 5:239, 571, 572) EMS

T-S 10J5.12 1r

1r

Transcription

Moshe Gil, Palestine During the First Muslim Period (634–1099)‎ (in Hebrew) (Tel Aviv: Tel Aviv University, 1983), vol. 3.

Recto

  • בשמ רחמ
  • כתאבי אטאל אללה בקא מולאי וראייסי אלשיך אלגליל ואדאם עזה ותאיד[ה ונעמאה]
  • וסלאמתה מן צור לי בקין מן מרחשון כתבה אללה עליה באחסן אל [ ]
  • עואקב ען סלאמה ועאפיה ונעם אללה תע מתראדפה לה אלחמ[ד עלי דלך וען]
  • שוקא שדידא אלי משאהדתה וכדמתה אסלה תע אן יקרב יום [אלאגתמאע ביננא]
  • ורדני כתאבה אלעזיז //מן אלקדס אלמחרוס// מע כתאב מולאי אלשיך מר ורב שמעון הסופר [ מן]
  • אללאדקיה ופהמת מא תצמנה מן וגוה אלסרור ואלאשתמאל עלי אלמחבה
  • ואלגמיע מנה כבת אללה עדאה תפצלא ואחסאנא לא אעדמני אללה מא מנחני
  • מנה וקד כאן מולאי אלשיך אבו עלי אסמאעיל בן רעבוב חרס אללה חיאתה מגדדא
  • לדכרה פי כל אלאוקאת ומתוקעא לחואיגה ראגבא פי קצאהא פצוב [ ]
  • מן קצא חקה או כלף בחאגה מן חואיגה וקד עלם אללה תע דלך מני פכפא בה
  • שהידא וקד גרי עלי פי הדא אלטריק בעד פראקי למולאי אלשיך אבו עלי //אחואל// [[לענדה]]
  • וכאן עקבאהא אלי כיר וסלאמה ללה אלחמד עלי מא תפצל בה ומנה אלעוץ עלי
  • מא דהב ולכתרה מחן אלנאס פי אלבחר צגר מא גרי עלי ולעלמי אנה כבת
  • אללה עדאה סאילא ען אחואלי אטלעתה ללא יסבק אלי קלבה שגל פאלדי
  • דפע אללה אכתר ואנא פי הדא לאלוקת טאלעא אלי אלקדס אלמעמור ומא
  • יכפא עליה אטאל אללה בקאה מא ילזמני מן אלואגבאת פאן אעדרת פיהא
  • פי הדא אלוקת פרבמא סאקצד אלספר נחוה תקה במסאעדתה
  • ואללה אלמופק פאן שרפני פסח אללה מדתה בחאגה או בכדמה כאן דלך
  • מן אסבג נעמה עלי ואעתקדת דואמהא לדי וקד אנגע קלבי לא אוגע
  • אללה קלבה בכבר רבינו מבורך הח בח //תנצבה// פקד כאן גמלה מא להא מתאל
  • וגבל מן גבאל אלעלם וקד כאן רזקת מנה אלחט אלאופר מן גמיע תלאמדתה

Right Margin

  • אסל אללה תע אן יחסן עזא אלגמיע פיה ויופק מן יקום מקאמה פימא ענא ויתגאוז
  • לסאוה [ו]יחסן מכאפאתה אנה ולי דלך לא אלאה הו ואסלה תע אן יתפצל במא הו אהלה

Top Margin

  • קראת עלי מולאי ורייסי
  • אלשיך אלגליל כבת אללה
  • עדאה אתם אלסלאם ואגזלה
  • וסאלתה באללה אלעטים
  • ליעידני אלי מא עהדתה
  • מן אלמכאתבה ויסקט מא
  • אבתדא בה פמא אוגב
  • קטע כתבי סוא דלך
  • ואדוני חכם כחכמת
  • מלאך
  • האל

T-S 10J5.12 1v

1v

Verso

  • ויכץ סידנא מרינו ורבינו הרב המובהק יח לע באתם אלסלאם ומולאי אלשיך מר
  • ור ישועה כצצתה באתם אלסלם ולי מדה לם אסמע כברה ואטן סאפר אלי אל
  • גרב ומולאי אלשיך אבו עלי חסון בן יחיי אחיאה אללה ולא וגה לאעאדה אלסואל פי אן
  • וצל אחד מן אהל טליטלה או וצל ביד גירהם כתאב מן אלאהל אן יכון מקאמי פי דלך
  • וקד כנת אטן אן יגאובה יעקב בן נחום פי אלדי ערפתוה //מן כבר אלשער ואלגנה// אני אנפדתה מעה הל תכון
  • קבלה שי אם לא או לעל קד וצל אלי מר ור ישועה חרס אללה חיאתה //גואב פי דלך אן כאן לם יסאפר// וקד כאן לי ענד
  • ארמלה [ ] בן מסעוד ג מאיה וכמסין דרהם אבריסם כראסאני //תכלץ מעי מן אלעדאב// פאנפדהא אלי
  • מר //אבי אלפצל// סהל בן סלאמה אלחלבי //אלדי// כאן קד יסאפר מעי מן אטראבלס אלגרב פסלם דלך אליה
  • בכתאבי //פי חלב// ואגתמעת בה פי הדא אלוקת באללאדקיה פדכר אן אלאבריסם אלדי
  • קבצה מן אבן מסעוד הו מע גמלה אעדאל //לה// בצור פי דאר אלקאצי ומא כאן ללכלאם
  • אליה פ/י/ה אכתר ממא סאלתה פי קרץ פאקרצני דינארין אלא סדס ורגבת אליה
  • אן יחמלה אלי מצר מע רחלה ויסלמה אלי מולאי ורייסי אלשיך אלגליל אטאל אללה עלוה
  • וידברה חסב מא יראה פקאל נעם פאן //תם// דלך פיבאע ויקבץ אלדינ[ארין] אלא סדס אלדי //[קרצהא]//
  • ויקרר אלבאקי ענדה חרס אללה חיאתה אלי וקת יעלמני מנעמא ותפצלא ואגבת[ה
  • [ ] ושלום יוסיפו לך ישע רב כרוב מזרח למערב [
  • ואן תעדר קבץ אלאבריסם מן אבי אלפצל סהל בן סלאמה פקד געלת מולאי אלשיך אבו יעקב
  • יצחק בן יוס[ף] אלאנדלסי וכילא פי קבצה מנה וגעלת ידה מתל ידי ופעלה כפעלי ומניתיו והרשיתיו
  • אגב ארבע אמות קרקע עם מחמת שלש מאות וחמשים זוזים שיש (!) שיש לי אצל סהל בן סלמה (!) זה
  • לזכות בהן ולעשות בהן כאוות נפשו והקניתים אותו בקנין שלם שריר וקיים ויכול לתבוע אותו בכל
  • [בית דין] שירצה [ו]לקבע [זמן ולבטל זמן ומה שיעשה עשוי] ומקובל [עלי ועל יורשיי אחרי]
  • מיומא דנן ולעלם ואן דעאת אל[צדו]רה אלי חכם פמולאי אדאם אללה [עזה] ישהד עלי כט יד[י
  • כבת אללה עדאה ואנא אטן אני לא אחתאג אלי שי מן הדא פאנמא פעלת דלך ב[

Upside-Down

  • מולי ו[סידי] אלשיך אלגליל אבו יחיי נהראי בן נסים שאכרה תפצלה
  • אדאם אללה בקאה אסמ[אעיל] בן אסחק אלאנדלסי
Image Permissions Statement
  • T-S 10J5.12: Provided by Cambridge University Library. Zooming image © Cambridge University Library, All rights reserved. This image may be used in accord with fair use and fair dealing provisions, including teaching and research. If you wish to reproduce it within publications or on the public web, please contact genizah@lib.cam.ac.uk.