Letter: T-S 28.11

Letter T-S 28.11

Tags

Input date

In PGP since 2004

Description

Letter from Madmun b. David: Murder of the 'Caliph' and return of Jewish life to normalcy. Aden, 1202.

T-S 28.11 1v

1v

Transcription

S. D. Goitein and Mordechai Akiva Friedman, India traders of the middle ages : documents from the Cairo Geniza : India book (Leiden and Boston: Brill, 2008), vol. 2.

II, 67

  1. בשם רחמן
  2. כץ אלחצרה אלעאליה אלסאמיה אלשיכיה אלאגליה אלמאלכה
  3. אלמנעמה אלמתפצלה אלמופקה אלסעידה אלאמינה
  4. אדאם אללה עזהא וגדד סעדהא ובלגהא מן
  5. אלזמן גאיה אמלהא וקצדהא וכבת באלדל אעדאהא
  6. וכצהא בגזיל אלסלאם אלתאם וסני אלתחיה אלזכיה
  7. ואלאלמאם ויסאל אללה סבחאנה אן יסהל סרעה
  8. לקאיהא עלי אסר אלאחואל ואבלג אלאמאל
  9. בחולה וקותה אנשא אללה תעאלי וינהי וצול
  10. כתאבהא אלעזיז והי תדכר מא לחקהא מן
  11. אלתעב מן אלפלפל אלדי כאן מעהא ועלם אללה תעאלי
  12. מא כאן מקצודי פי דלך אלא נפאעתהא
  13. פאללה תעאלי יעינהא וינגח מקאצדהא אמן אמן
  14. וממא ישארכהא אלממלוך אן אלאגנאד
  15. קתלו אלמלך אלמעז אלדי אדעא אנה כליפה
  16. וולי בעדה אלמלך אלנאצר איוב בן אלסלטאן
  17. סיף אלאסלאם ו[[ו]]אתאבכה אלסלטאן סיף אלדין סנקר
  18. פלמא אסתקר רפעו אלממאליך קציתהם אליה
  19. וחמלהם עלי קציה אלעדל ותצאהרו
  20. אלממאליך באלתזאם אלשריעה ולבסנא אלעלמאה
  21. ווזנא אלגזיה וכאן דלך גמיעה פי שהר
  22. סיון קבל //ערב// עצרת ביום ואחד ועידנא
  23. כמא יגב שמחים וטובי לב ותעצבו
  24. עלינא אקואם שונאים ומא סוו שי בחמד אללה
  25. תעלי וכל מא לחקנא הו בברכה
  26. אלמולא אלריס משה זצל ובברכה אלמולא
  27. אלחסיד רבינו יצחק ובברכתהא אללה תעאלי
  28. יגזיהא ען מרותהא כיר ווצל כתאבהא
  29. אלעזיז והי תשיר עלי אלממלוך באשיא
  30. ואלממלוך כאן קד אמלהא אנה יעמלהא
  31. ומא ישך אלממלוך אנהא כלד אללה עזהא
  32. מחבה משפקה אללה תעאלי יעין עלי [[אלואגב]]
  33. אלקיאם בואגב חקהא אןשא אללה תעאלי
  34. ואלממלוך יגדד אלתעויל עליהא במק[אבלה]
  35. אלקטעתין אלדי סירהם אלממלוך צחבתה[א]
  36. ותנעם ותסתכתב להם נסכה תאלתה
  37. ותכון כט מליח וורק מליח ותסתכתב
  38. לי כתב אלטב תאליף אלמולא אלריס

Margins:

  1. ואן ערץ עליהא שי אלנסך אלמלאח ממא תעלם אנה
  2. יצלח אנעמת כלד אללה עזהא בשראה ואנפאדה ודלך בפצלהא
  3. לא עדמתהא ולא כלות מנהא אבדא

In a different hand:

  1. חאצר אלכתאב אלממלוך מצמון
  2. בן יעקב רית יכץ חצרה סיידי
  3. באפצל אלסלאם אלתאם ואלחמד ל[.].. אלאה
  4. כאנת אלעאקבה עלי כיר פיהני ישראל
  5. גמיעהם בדה אלישועה ומא כנא אהל לדלך
  6. ואנמא פעל הקבה מא הו אהל לה למען
  7. שמו הגדול ופרג עלי ישראל אלמקימין פי
  8. דיאר אלימן גמיעה וכאן פרג אהל אלגבאל
  9. קבלנא ביסיר אלי אן וצל אלסלטאן אלינא
  10. ותכאמל אלפרג בעזרת הבורא ובסעאדה
  11. אלמולא יודו ליו' חסדו חצרה אלמולא מכצוצה
  12. באפצל אלסלאם ומן תחוטה ענאיתוה מכצוץ
  13. באפצל אלסלאם וכל הנלוים עליו והסרים
  14. אל משמעתו מכפלים באלף אלפי שלום
  15. כתב יז בתמוז אתקיג לשטרות
  16. ישע קרוב
  17. אלממלוך מצמון בן דויד רית
  18. כתב נסכתין וסיירו טריק אלחגאז

Translation

T-S 28.11 1r

1r
Image Permissions Statement
  • T-S 28.11: Provided by Cambridge University Library. Zooming image © Cambridge University Library, All rights reserved. This image may be used in accord with fair use and fair dealing provisions, including teaching and research. If you wish to reproduce it within publications or on the public web, please contact genizah@lib.cam.ac.uk.