رسالة: CUL Or.1080 J28

Recto:

1. אלממלוך שלמה ברבי אליה הדיין סט
2. אתה ייי לא תכלא רחמיך ממני
3. סבב אצדאר הדה אלאחרף אלי אלאך אלעזיז אלאציל
4. אבו אלברכאת הדרת הנשיאות אדאם אללה סעאדתה
5. ותבת נעמתה ואבקא לה מהגתה ובלגה פיה אראדתה
6. וגמע שמלי בסעיד טלעתה עלי כיר ועאפיה אן שא אללה
7. אנני אנהי כתרת אלשוק אליה ואלתאסף עלי אלפאית מן קרבה
8. ומתקצי ען אכבארה פכלמא סמעת אנה פי עאפיה
9. אפרח פאללה יגעלה פי אתם נעמה ויגעלה קיים אלגאה
10. ויגעלה לשם ולתהלה ברכה בקרב הארץ וסוא דלך
11. אן אלממלוך פי עאפיה תאמה יודו לייי חסדו ונפלאותו לבני
12. אדם לם אעוז סוא נטרך אלסעיד ואן קד גא בן עמתי
13. אלשיך אלאגל מוסי ופקה אללה קעד אלגמעה אלתי הו ראש חדש
14. אדר ויום אלסבת ואלאחד ואלאתנין סאפר בעד אן אכד
15. כתב מן מולאי פאללה ינגח טריקה ויכפיה אמר כל אנסאן סו
16. וסת אלעלם פי עאפיה ובנתה אלסדידיה פי עאפיה
17. וסמענא אן בנת עמי סת אלמעאני ופקהא אללה
18. תעייד ענדנא פסח פפרחנא אלי גאיה פאללה
19. יגמע [[של]] שמלנא בכם גמיע ולא ימיתני
20. בחצרה אלא חתי נגתמעו פי בלדנא ונחן
21. מטמאנין סארין פארחין בבעצנא בעץ
22. למען שמו הנכבד והנורא שנ אם יהיה נדחך

Recto, margin:

1. בקצה השמים משם
2. יקבצך ייי אלהיך ומשם יקחך
3. וכתרת שוקי אלי אכוך אלשיך אלרשיד
4. אבו אלמפצל אסעדה אללה תעאלי ושאהדנא
5. פרחה אן שא אללה ושוקי איצא לואלדך אלשיך
6. אלאגל אבו מנצור שמ צו ושוקי
7. אלי עמך אלואלד אלאגל אלשיך
8. אבו סהל שמ צו וסמעת
9. אן ולדה אלשיך אבו אלברכאת
10. אמלך ופרחת לה פאללה
11. יכתר מנכם גמיע

Verso:

1. ויופקנא גמיע ונשתהי מן אנעאמך אן תמצי
2. אלי דאר עמתי סת אלגמאל אם דאוד ותקריהא עני
3. אלסלאם ותהניהא עני בכלאץ בנתהא ואללה
4. אלעצים לקד פרחת בכלאצהא ופרחת להא
5. גאיה אלפרח [[ומהא]] ותסלם עלי אלשיך
6. יוסף בן בנת עמי ועלי אכיה נסים
7. ותערפה אן אכתהם תסלם עליהם ואלצגיירה
8. תסלם עלי כאלהא נסים וכאלהא אלשיך יוסף
9. ותסלם לי עלי צהרי אלשיך אלאגל אלמכין
10. אבו אלפרג אלעטאר שמ צו ותערפה אנני
11. עתבאן עליה גאיה אלעתב עלי אנקטאע
12. כתבה וקד סיירת לה כתב עדידה ולם וצל
13. אלי שי מן גואבהא אלסלאם אלתאם עליך
14. אולא ועלי [[ואלדך]] ולדך אלפרע אלנגיב ועלי
15. אהל ביתך ועלי אכיך ואהלך ואתה שלום
16. וביתך שלום וכל אשר לך שלום אלגואב(?) ושלום

Verso, margin:

1. ואלסלאם אלתאם ואלתחיה
2. ואלאכראם עלי אלמולי אלשיך אלאגל
3. בן עמתך אבו אלסרור ועלי ואלדתה ועלי ולדה
4. ובפצלך תערפה כתרה שוקי אליה וסלאמי עליה
5. מהמא כאן מן חאגה או כדמה תשרפני בקצאהא סרעה
6. ושלום עליך ועלינו ועל ישראל אמן נצח סלה אלממלוך
7. אלאצגר שלמה ברבי אליה הדיין

Verso, Arabic address:

1. الى سكندرية يسلم للشيخ الاجل ابو البركات بن الشيخ بو منصور اليهودي الحريري
2. من مصر من عند ابو البركات بن الديان ابو الفرج بن الريس امانة موداة

Verso, Judaeo-Arabic address:

1. יצל אלי אסכנדריה חמאהא אללה יסלם ללשיך אלאגל אבו אלברכאת הדרת הנשיאות
2. בן אלשיך אבו מנצור אלחרירי אכו אלשיך אבו סהל אלצאיג שמ צו מן מצר
3. מן ענד בן אלרייס אמאנה מודאה