منحة في رسالة: ENA NS I.33
رسالة ENA NS I.33- الاقتباس المرجعي
- Alan Elbaum, unpublished editions (n.p., 2019).
- Relation to document
- Digital Edition
صورة
النصوص المفرّغة
الترجمة
Editor: Elbaum, Alan
ENA NS I.33 2
Alan Elbaum, unpublished editions (n.p., 2019).
Recto:
- בש רח
- אלי אכי ואעז אלכלק עלי וענדי מן אלשוק ואלוחשה
- כתיר גמע אללה בינא עלי אסר חאל ואלדי
- תחב עלמה אן לי מן חין כרגת מן ענדכם
- מא וק . . . . . . . לא גוא[ב] ולא [כ]תאב
- סוא כתאב ואחד מע אלחא.. וליס פיה זבדה
- וקד וגהת לך עדה כתב וא[נא] אשכי לך רמד
- אלמראה ואן תוגה לנא אשיאף אן יצלח להא
- לם תקדחך אלמרוה אן תפעל דא אלנאס יקעו
- פי אלאסר ויפרג אללה ענהם ונחן וקענא
- פי די אלשדה מא צבנא מן יפרג ענא ואללה
- לו ראי חאלנא לרתי עלינא אקאם יוסף ו׳ אשהר
- באלחמה אלמתלתה ואמה להא ח׳ אשהר רמ[דה]
- קטעה לחם ואלצגיר אשר בעיניה קד רמדו
- ואגראבו (!) ואנא ואללה פי גאיה מן טיק אל...
- לא תקום פעמים צרה ואלסעה [י]א[כי] בחק
- אללה עליך כד אלמידה ארהנהא עלי כמס
- דראהם ואטלע בכתאבי אלי אלשיך
- אבו אלמערוף בן אלטפאל יזכר בטוב יסלם
- לה כתאבי אליה ולכמס דראהם פקד כתבת
- לה צפת רמדהא ואיש מא דפע לך יצלח להא
- אנפדה אלינא [[סע]] סרעה מע רגל תקה ווציה עליה
ENA NS I.33 1
Verso:
- אלי קוץ אלי אבו אלמנצור (אלמנצוק?) [[ו]] בן אלמשוריר
- ותקול לשיך אבו אלמערוף יכתב לנא עלא
- כל אשיאף אסמה וינפד לנא כחל נאשף [ל]הא
- ולצגיר ותנפדה לנא סרעה לאנהא תחת
- שדה ותמור אלי אלשיך אבו אלמכארם
- אבן נפיע תסאל לה אן יפתח אלמצאח[ף]
- ללהוא ויקלבהם וקת בעד וקת ל[ילא]
- יתהרו פקד עלם אללה מא פי קלבי מנהם
- ותמר לשיך אבו סרור בן אלכאף תקריר
- סלאמי ות[סא]לה אן יפתח אלמצאחף אלדי
- ענדה וקות בעד וקת לילא יתהרו וכדא
- יפעל בלתיאב אלדי ענדה לאן פיהא
- חריר אכיר מא יסוס כל קליל ינשרהם
- ותכתב לי כתאב שאפי בגמיע אלאמור
- פאנא מנתצר אלי כתאבך פאן כאן פי
- כתא/ב/ך פ[רג] פנחן ...דר. אכתאבך (?)
- וידברנא א[ל]לה ואלקאעה אלדי לנא אן כנת
- אכליתהא בהא ונעמה ואלם פכליהא וכד
- אלדי פיהא כץ נפסך באפטל אלסלאם
- ומן תחוט בה ענאיתך באפטל אלסלאם
Verso margin:
- ונחן גמלתנא מהניין לכם שאכרין ללה במא אתצל לכם מן אלכיר
- ולסלאם
