Scholarship on Letter: Bodl. MS heb. d 65/10

Recto

1. [זאד אללה יאסידי] ומולאי פי איאמך ואדאם תאיידן ונעמאן ואנסי פי אגלך וחסן לך אלעאקבה פי דינך ודניאך ולא אכלאך מן אל
2. [              ] יגב עליך יאסידי אלתמסך במן תמסך בך ומחאפט'ה מן יהאפט' ודך ויכרה בעדך ואלקיאם פי אסבאב
3. [             ]ך ואלענאיה באמורהם חסב קצדהם אליך ובקדר מא תבלגה טאקתך ותרך אלאגפאל ואלאהמאל פי חואיגהם חתי
4. [יט']פר מן קצדך ומן ולג' אליך אסבאבה במן קצד סואך ותחדר אן יט'פר בה פהדא אלדי יליק בך ובאדבך ומייזך
5. ולא סיימא וקד תקדם בין אלאבא זכו' לב' מא יוגב אלזיאדה ואלתאכיד          וקר אכתרת עליך באלסואל ואלרגבה פי
6. עדה' כתב אן תג'הד נפסך פי אלא יט'פר בנא מן ישנאך ואן תע[ג]ל אלענאיה פי סרעה אלאנפאד ואלחרץ פי ציאנה
7. מא יצל ואלתאכיד פי סרעה אלגואב פמא וגדת פיך נשאט אלי דלך ולעמרי אנך מעדור לכתרה' אשתגאלך באחואל
8. אלדניא לכן אנמא הי טאעה ואחדה פי חין כרוג' אלקאפלה תפרג' דהנך אלי מכאתבה' מן תכאתבה לא גיר והו אמר
9. ק[ר]יב גרא           וקד עלם אללה יאסידי מא עלי קלבי ומא אנא פיה מן וצול כתב כתירה פי וקתנא הדא מן ענד סידנא
10.  האיי נט' רח' מע אלפיוג תאריכהא ו' שהור מן בגדאד ווצול אגובה' מסאיל כתבהא ג'ירנא ונחן פלא דכר לנא
11.  מעהא ולא כתאב ולא גואב מסאלה ואלכלאם עלי מא מצ'י לא פאיד פיה [           ] אלאן יאסידי אחב יכן לכלאמי מוצ'ע
12.  פי נפסך ומוקעא מן קלבך ותגאובני עלי מא אסאלך פיה ותנשט פי מ[                        ]ל ידינא בך ובקרב [           ]
13.  מנך עלי גירנא            כנת אנפד'ת אליך מע סידי אבי נצר צדקה אלשאמי אידה אללה כתאב לסידנא האיי נ[ט' רח' ופיה]
14.  מסאלה פי מהם עטים כביר סלתה סואלך פי אן תנפדהא מסרע לעל יתפק פיג' ותאכד עליה פי אלגואב
15.  איצ'א מע פיג' יכרג מן ענדהם ארגו קד פעלת דלך ויצל אליי גואבה קריב ומן אל[מהד]יה אנפדת צרה
16.  פי וסט צרה לאבן עלאן עלי ידי אלשיך אבי עמראן מוסי בן יחיי אלמגאני אידה אללה [          ] ומסאיל קד[               ]
17.  עדה כתב אליך ארגו קד וצלת וקד אכדת בהא ספתגה לבגדאד כמא סאלתך ובעד דלך כתבת כת[אב אכר]
18.  מע פיג כרג פי אול שהר שואל מן אלקירואן [אסמה] סאלם אבן אלטנסאוי ומעה כתאב אלי סידנא האיי [נט' רח']
19.  [                        ] סרעה גואבה ארגו קד וצל גמיע דלך אליך                            ואנא אסתחלפך באעט'ם אלא[ימאן]
20.  [             תגאו]בני מסרע מע פיג' אן אתפק כרוגה פי כתאב אלשיך אבי עמראן בתעריפי פי א[                      ]
21.  [                כתא]בי אלואצל מע צדקה מע אלמסאלה           ואן כאן קד וצל אליך אלכתאב אלדי מע אלפיג ואנפד[ת          ]
22.  [                   ] אלדי עמלתה פי אמר צרה' אלדנאניר והל אנפדתהא ועלי אי טריק אנפדתהא או אכדת [             ]
23.  ספתג'ה ווצול גמיע אלכתב ואלמסאיל אלדי קד שרחתהא לך ומא אלדי לם יצל אליך מנהא אחב [                 ]
24.  דלך וביאנה פי אלבר ואלבחר ואן וצלת אליי כתב לטיפה ומסאיל בעד כרוג אלקאפלה פתנפרהא 
25.  מע פיג אן אתפק כרוגה ללשיך אבי עמראן בגיר תאכיר וכדלך כתבת לסידנא האיי נט' רח' 
26.  תוכד עליה אן ינפד גואבי מע פיג' יתפק כרוגה מן ענדהם ותעלמה במא עלי קלובנא מן חאל
27.  ג'ירנא בסרעה ותאכיר אגובתנא            ואעלם יאסידי אני קד סאלת וצ'מן לי אגובה בעץ' [                 ]
28.  ואלמסאיל פי אסרע וקת ואן יכתב אלדי תצל אליה במצר מע פיג אלי בגדאד בדפעה לראס אלמתיבה
29.  ונרבח גיר אלטריק ואלסרעה ורגב אליי פי דלך ולם אפעל אד ביננא מן אלודאד ותקדם בין אלאבא נ'ע'
30.  מא אוגב אלתמסך בך ולמא וצלת אלאן אגובתהם חצל להם אלט'פר ועלת ידהם פאללה אללה יאסידי
31.  לא תלחקך [א]לגפלה ות[קפו] עלי אלכתב אלואצלה א'ן כאן לנא פיהא כתאב או לא ותכתב לסידנא ראס אלמתיבה

Right margin

1.               ] קד אנפד אלינא כתאב או לא וקד אקסמת עליך אן תפרג [              ] גמיע אלאשיא ולא יזול כתאבי הדא מן בין 
2.                ] מא סאלתך ענה ותביין לי גמיעה ביאן חסן ואן כתבת כת[אב                             אלש]יך אבי עמראן פתכתב אליי פיה סטרין 
3. [קראת עלי כאצה נפסך] אלשריפה אפצל אלסלאם ואכותי וסאדתי אל[                   ] אלסלם ואלתלמידים ואלאך וכל מן ענדנא יכצך אלסלם

Verso

1. סידי ומולאי אלשיך אלגליל אבו אלפרג אטאל אללה בקאה               מן נסים ביר' יעקב זקל 
2.                                               ואדאם תאיידה ונעמאה 
3. יוסף בן יעקב בן עוכל נ'ע'          אללה נאצרה וחאפט'ה