رسالة: DK 230.1 (alt: 22)
رسالة DK 230.1 (alt: 22)What's in the PGP
- 1 Transcription
الوصف
Letter from Maymūn b. Khalfa, Palermo, to Nahray b. Nissim, Fustat. 18 August 1056 (Gil). Describes the movement of goods and ships to and from Sicily. The government of Sicily imposed on Jewish merchants in Palermo a customs import duty (ʿushr), normally imposed only on foreign merchants, because resident Jews cooperated with their foreign partners and declared incoming goods as their property. A judge and other Jews were sent to prison. The writer reproaches Nahray for his dealings with a resident of the island, Sulaymān b. Shaʾul. Also mentions "the ships (plural!) of Abū ʿAbdallah Ibn al-Baʿbāʿ:
العلامات
Editor: Gil, Moshe
DK 230.1 (alt: 22) recto
recto
-
כתאבי יאסידי ומולאי אטאל אללה בקאך ואדאם סלאמתך וסעאדתך וצרף ענך [אל]אסוא ברחמתה מן אל
-
מדינה לה כלון מן אלול כתמה אללה עליך ועלינא באחסן כאתמה ען חאל סלאמה פי אל[נפ]ס ושגל פי אלקלב מן
-
מא חדת עלינא פי הדא אלוקת אלחסן אסל אללה אן יפרג וצלת כתבך פי מ[רכב א]לשיך אבו עבדאללה
-
בן אלבעבאע מן אלשתי תדכר סלאמתך אדאמהא אללה וסררת בדלך דכרת וצול אלרזמה סאלמה
-
חמדת אללה תע דכרת מא עמל פי אלשש וביע אלמתאע ואן אלפרכה תכסר ואלכליע יכסר אלתלת
-
ומא בקי פי אלקיסאריה ארגו אן לם ינכסר שי ועז עלי דלך כתיר אף כאן כסארא עאגלה ושי לם
-
יצל אלי דכרת בקיה אלאנטאע ארגו אן קד ופקת סוק כעד דלך לאן גאו בטלבהא ועלי מא קיל
-
אביעת בדינרין אלזוג לעל תנגבר אלכסארה ואמא אלשש יאמולאי מא נחסן נצף לך צורא חאלה הנא אן
-
מא יגד אצל כאצה אלגיזי יסוא ל דינ אלי והו קליל דכרת אנה לם ימשי ענך ואני אנא מא נכסר אלא אלצבר
-
לית לו אביע באכתר כסארה וכאן יכון תמנה ענרי אפצל ממא אביע בכסארה יסירה ותעטל
-
עלי תמנה ג סנין תם וצלת כתבך פי הדא אלעאם תדכר אמר אלשש אנה איצא אלי הדה אלגאיה לם ינבאע
-
ענך וקד טלעת בעצה למצר ולם תקדר עלי ביעה ומא אדרי יאמולאי אש הדא סידי אבו אלבשר
-
סלמאן בו שמעון ידכר אנה באעה בדינרין ורב אלרטל והו משתהא גיר אן ערפני בכתרה אשגאלך פי
-
באבת בן עלאן ועיאש וגירהם ואנת תעלם יאמולאי אן מן אשתגל בשי פאתה גירה והדא שי מסתפאץ
-
ואנמא יגב עלי אלאנסאן אדא קצד באב מא יתכלף בה אלי אן ינגזה וקד ואללה אלעצים אוגעני דלך
-
כתיר לאן לם יצח פי ידי סוי אני עלמת באלכסארה חתי אלחסאב אכדתה עלי וקלת אן לחקת ואסעני
-
אלוקת עמלת לך אלחסאב יאמולאי חסאב קליל לה סנתין מא חאן לא אן ינתגז מא כנת אטן בך הדא אלטן
-
ומא קדרת אלא אן חואיגי ענדך מקציה ולולא הדא למא כלפתך בשי תתעב פיה לאנך ענדי אגל
-
מן הדא ואנא אעלם אן לו כלפך מן לא תערפה בחאגה לכאן תענא פיהא אכתר מן הדא ונעלם אן
-
קצא חואיג אלנאס מן אכלאקך באלטבע גיר אני נקול הדא בכתי ונגמי ואלא אנת מא עליך לאימה דכרת
-
מא חמלת אלסנה עדל פלפל וח כתאן ומן כתב ר אברהם תעלם אין חמלת וצלת כתב ר אברהם לסאיר
-
אצחבנא ידכר פי כתאב כל אנסאן גמיע מא חמל פי אלמראכב חרץ מנה לאלא תציע אלכתב יכון
-
כתאב ואחד ינוב ען אלגמיע אלא הדה אלבאבה מא דכרהא אצל ואיסת מן אן יצל לי פי הדה אלסנה
-
שי למא אן כאן פי אלאסבוע אלכארג וצל כתאב ר אברהם למולאי אלשיך אבו יוסף ידכר אן וצל אליה
-
מן קבלך עדל פלפל ז כתאן וחמלהא מי אלמראכב ופי הדא אלאסבוע וצלת ללמדינה ואלעדל אלפלפל
-
מבצר פי בן אסכנדר אללה יכתב סלאמתה וקד חמל בן זידאן מנהא ב לסוק אביע מנהא ואחד מגהול
-
לאן קד אנהרש כישה ועליה ליעקב ומימון לא גיר סער לב קטע תס ואלתאני אביע סער כז קטע תמ
-
עליה נהראי בן נסים ואלנאס יאמולאי באעו סער מ וקטע אלעדל תק טאלע ומא אדרי אש כאן הדא אלשרי
-
אלמבארך ומא נקדר נביע פי הדא אלוקת שי לאן אצחבנא אהל אלבלד טלבו באלעשר ופי יומנא
-
הדא עשר עלי רחל אכי אלדי גאב מן אלאנדלס אללה תע יבטל אלגזירה לאנהא מציבה עצימה ונחן
-
נתלטף לעל לא תתם הדה אלבאבה עלי שונא ישר אללה תע יפרג ענא ברחמתה וען כל ישרא
-
ואדא אנחל הדא אלאמר אן שא אללה נביע אלבקיה ומא נדרי אלעדל אלבאקי מן אי באבה ה[ו ולא]
-
אן נביע אלבקיה ואדא תפצל אללה בסלאמה אלפלפל אצפת מא יכצך פיה אלי תמן אלכתאן
-
ואשתרית לך בה מא יופק אללה ומא אעלמך יאמולאי אן קד אסתכרת אללה תע וחמלת פי קארב
-
אלוזיר רזמתין צחבת אכי אלנצף מנהא לשיך אבו אסחק ברהון בן מוסי זל ולמוסי בן אבו
-
אלחי ואלנצף לי ולאכי וכאן לשיך
recto - right margin
-
אבו אסחק מן
-
אלנצף אלמדכור אל
-
תלתיי ואלתלת למוסי
-
בן אבי אלחי וקד וצל[ת]
-
כתבהם בחמל
-
אלרחל אליך ואלרזמתין
-
גמיעא כלטה ואל
-
סעה יאמולאי אדא
-
מן אללה תע בסלאמתה
-
תקף עלי אלמתאע
-
ותחסן פיה אלנטר
-
[לאנה] מתאע מכתלף
-
פרכה תסוי דינ
-
ופרכה תסוי דינרין
-
אללה אללה יאמולאי נחב
-
אן תשר מן אלצבי
-
והו יכון בי[ן י]דיך
-
ותתולא מעה [ ]
-
ביע פמא ח[צ]ל [לך מן אל]
-
דנא תקבץ אנת חרסך
-
אללה אלנצף ויקבץ הו
-
אלנצף ולי פי [ ]
-
רזימה חריר וה
-
מצליאת וד בסט
-
הם כלטה בי[ני
-
ובין אכי
recto - top margin
-
ולי איצא פי
-
קארב אלוזיר
-
נפסה לא קטעה
-
רצאץ אלנצף
-
לשיך אבו אל
-
בשר סלימאן
-
בן שאול יקבצה
-
מסתחקה ואלנצף
-
איצא כלטה ביני
-
ובין אכי נחב אן
-
תשד מנה ותעצדא
-
פימא יחתאג פיה
-
וכדלך תתפצל
-
תעמל לה אלחס[א]ב
-
תדפעה אליה
-
ותדפע אליה
DK 230.1 (alt: 22) verso
verso
-
ותדפע אליה אש מא פצל לי ענדך אן כאן אשתרית בה שי אדפעה אליה ואן כאן לם תשתרי שי אדפע אליה אל
-
דנא ואללה אללה יאמולאי תאכד עלי ידי אצחבנא לא יוגהו לצקליה דרהם לאנה ואללה אלעצים תחת אלצרר הו ומא יכתלט בה לאנך
-
תעלם אן מא יכפא ען אצחבנא שי ולא ידכרו אלצחיח אלא ויזידו עליה אמתאלה והדא כאן סבב טלב אלסלטאן אלעשר
-
לאן רפע אליה אן אהל אלבלד ישארכו אלגרבא ויגוזו רחאלאתהם באסמאהם אללה אללה יאמולאי וקד פרג אללה תע
-
אלנאס אלסנה אן שא אללה יסאפרו אלנאס ללמהדיה ויסתריחו מן הדא כלה דכרת אמר אלשיך אבי אלבשר
-
סלימאן בן שאול ומא עאמלך בה יאמולאי לא תלום אלא צאחבך לאנה פי וקת דפע אליה אלאעדאל קאל לה פיהא
-
אלאן תלת אלרבח לא גיר וכאנת בינהם מואקפה ומואעיד ואימארה וכאתבה בהא לאן אלרגל כמא תעלם מא
-
יכתב פוצל כתאבך אנת חרסך אללה תסאלה אן יחמל אליך תלת תמן אלאעדאל והדא שי לא יסוג פי טריק אלתגארה
-
אן יכון אנסאן דמע אליה שי ואוצאה אן לא ידפע לאחד שי ואנמא קאלו לה קול אן לפלאן פיהא תלת אלרבח פלא
-
תלומה וליס לך עליה לאימה אד עמל שי תוגבה אלתגארה ואלמכאחבאת וחסבך אן למא וצל כתאבך
-
ודרגה אקראר אלכהן באן אלתלת לך דונה מא אחתאג אלי תתביתה אלא פי אלוקת דפע לר יהודה מא
-
יכתץ בך ואלדי עמל פי אלעלאוה אכתר מן גמיל ודאך אנה כאן וקת אלסיף ואלנטע מא יגסר אחד
-
יקבץ רחלה וקף וקבץ אלעלאוה וגעלהא פי מכזן אלי אן אביעת קליל קליל והו יכצך באלסלאם וילומך
-
פי באב אלמרגאן כלטתה מע ר יהודה רו חיים וקד קבץ ר חיים מא יכתץ בה וחבסת ענדך סהם אלשיך
-
אבי אלבשר ואלסעה יאמולאי תפצל אנטר מא חצל פי סהמה אשתרי לה בה שי ואנפדה אליה או אדפעה
-
אלי אכי יתכלף לה בה ותכון פי דלך משכור וקד קאל אן לם ינפד אלי רחלי אן אנא נאכד מן רחלה שי בקימה
-
רחלי מן מצר ואנת תעלם אנה שיכנא ויעז עלינא כלנא ולא יקדר ר יהודה יכאסרה ולא גירה פתעמל
-
עלי אנפאד רחלה ותטייב נפסה במא קצא חואיגך ואלנאס מא יסתגניו ען אלנאס קד כאן פי וקת וצול
-
אלעלאוה מא יגסר יהודי יקף עלי אלסאחל ותפצל הו ומא קצר וקבצהא והדא מנה מראעה לך פלא יכון הו
-
גיר שאכר לך אעלמתך דלך ואלעלאוה פכאר אלדי דכרת לם תצל לאן קאל סידי אבו אלבשר סלמאן
-
בן שמעון בקית ברשיד כתאבך לא תכליני מנה בחאלך וסלאמתך וחאגאתך אבלג מראדך
-
קראת עליך אלסלאם ומולאי אלרב אפצל אסלאם ומן תשמלה ענאיתך אלסלאם וחסבי אללה ונעם אלוכיל
-
ואלמתאע אלדי יכץ אלשיך אבו אסחק ברהון הו מן תמן ג אעדאל כתאן וצלת לה פי אבן אלבעבאע
-
ואכר כתאבי הדא וצל אלי כתאב מוסי בן אבו אלחי יסאל אן יבקא מתאעה עלי חאלה וקד ⟦ ⟧ צאר אלסדס
-
אלדי כאן יכץ מוסי בן אבי אלחי לשיך אבו יעקב יוסף כן פרח נע אלקאבסי יקבצה סידי אבו אלסרור פרח
-
בן אסמעיל חרסה אללה אעלמתך דלך ופי הדא אלאסבוע אלדיאן ר מצליח ואלשיך אבו יוסף ואלשיך אבו
-
אלפצל בן כלף ואלשיך אבו אלבשר סלימאן בן שאול ור מטהר פי אלסגן להם אליום ג איאם עלי סבב אל
-
עשר ונחן נתלטף לעל אללה יאתי באלפרג פתדיע [ ] אצחבנא יכונו עלי חטר אללה אללה לא ת[גפל]
verso - bottom margin - address
-
לסידי ומולאי נהראי בן נסים נע מן מימון בן כלפה ננ אלקפצי שאכרה
-
אטאל אללה בקאה [ו]אדאם עוה ותאידה מצר אן שא אללה עז וגל
-
תוגיה אברהים בן אלאסכנדראני