منحة في رسالة: BL OR 5542.19

[כתאבי] אטאל אללה בקא סידי ומולאי ואדאם עזה ותאיידה וסלאמתה מן

[אלמסת]קר לי בקין מן אללה ערפך אללה ברכתה וברכה מא יליה ואל

חמד ללה רב אלעאלמין וקד כאן וצל כתאבה אלעאם אלמאצי ידכר מא

דפעה לסידי אבי עמראן בן אלחנן נע ווצלת אלבראה אלתי כתב לא עדמת

[תפצ]ל[ה] וקד כנת יאסידי ערפתך פי כתבי אלמתקדמה אן קבצת מן מוסי

[ב]ן [אלמג]אני חול נ רבאעי מכ[טט]ה פלמא כאן אלעאם אלמאצי חאסבתה

וגדת אלדי קבצת מנה נ רבאעי טלבתה באלבקיה מא וגדת מעה שיא

ואתפקת מעה עלי תמאנין רבאעי חאסבתה באלכמסין בקית עליה

תלאתין [ואלבאק]י נצבר עליה בהא פאסלפתהא מן ענדי לאעזאזך

עלי ואמא אעלם אני מא נצל אליהא מנה לסנין לאנה כרג מן אלבלד

וקד אצפת אלתלאתין ללכמסין צארת פ אשתרית לך בהא סבע

[ע]מאים קטן גיאד וקד כנת אנפדתהא לך אלעאם אלמאצי צחבת

סירי אבי זכריא יהודה בן מנשה נע ולם ארא מנך אלסנה כתאב בוצולהא

פעז עלי דלך וקד כנת סאלתך תשתרי לי באלבקיה ניל או פלפל ותנפדה

אלי מע מן תראה יהודי כאן אם גוי ותאכדת עליך גאית אלתאכיד

ומא ראית לדלך גואב ומא אדרי איש אלסבב פי דלך ואנא אעלם

יאסידי אנר כתיר אלאשגאל ומא אריד אן אתעבך פנחב מן תפצלך

תסלם אלבקיה אלתי לי ענדך לסידי אבי עמראן מוסי בן אבי אלחי אידה

אללה ולא תוכר דלך ענה פקד סאלתה ישתרי לי בהא מא כלפתה בה

פמא אחתאג אוכד עליך פי תסלימהא לה ומא אחסבהא אלא הדי[ה]

מן מאלך פקבצה קבצי ואלואצל אליה כאלואצל אליי ובאללה עליך

לא תעיקהא עלי לאני הון אתר גאיחה ואנא מתכל עלי אללה

ועלי תפצלך פי וצולהא אליה לא עדמתך ולא כלות מן תפצלך

ואנא אסאלך וארצו אליך אן תכלפני חאגאתך לאני מסרור בדאלך

כצצתך אפצל אלסלם ומן תשמלה ענאיתך אלסלם וצניעתך

ולרי אבי אלפרג יכצך אתם אלסלם וחסבי תקתי באללה ובה אסתעין

לסידי ומולאי אבי אלפצל סהל בן חסן בן סלאמה     מן אברהים בן כלף

אלסכרי                 אלפסטאט מסר  אן שא אללה

 אטאל אללה בקאה ואדאם תאיידה [וסלאמתה]